مرعي وكويتي تعرفوا على بعض ببلاتو وصاروا اصدقاء وتطورت صداقتهم الى مابعد بلاتو حيث انهم صاروا يتقابلون بشكل شبه يومي وصداقتهم طبيعيه مافيها اي شوائب بالحياه
الّا ان مرعي يحب يشتغل بيده يفكك ويركب اشياء ويحاول يخترع لكن كل اختراعاته بائت بالفشل
مره اخترع غساله وجاء حط الملابس بالغساله بيغسلهم واختفت الملابس الى يومنا هذا .. ومره اخترع مكرويف ولكن للاسف ضحايا هالمكرويف الى اليوم ١٢ والاصابات ٢٠ ..
عموماً مرعي مااستسلم لازال يقول ابطور نفسي ومصرّ انه يخترع آلة الزمن لانه حلم حياته هالاختراع منذ الطفوله
وكل يوم مرعي يشتغل ويفكك بالآله هذي الى ان جاء يوم الخميس 14/4/1444 الموافق يوم الاثنين ٢٨ نوفمبر ٢٠٢٢
مرعي: مفك
كويتي: خذ
مرعي: سكروب
كويتي: خذ
مرعي: مفتاح١٧
كويتي: خذ
مرعي: مطرقه
كويتي: خذ .
مرعي: خلاص الحين تقريباً انتهينا
كويتي: طيب وش هذي اللي سويتها؟
مرعي: هذي طال عمرك آلة انتقال عبر الزمن
كويتي: كذاااب لاتطقطق قول بس وش هذي؟
مرعي: والله العظيم مااستهبل انا لي فتره طويله اشتغل عليها
هذي على حسب دراساتي نقدر ننتقل خلالها لسنين قدام للمستقبل او نرجع لسنين ورا للماضي
كويتي: معقول !! طيب كم اقصى مده تودينا للزمن قدام أو ورا ؟
مرعي: صراحه ماجربتها لكن ان ماخاب ظني هي 999 سنه
كويتي : طيب حلو ، وش رايك نجربها على السريع 20 سنه قدام للمستقبل ونرجع ؟
مرعي: صدق تصمل انت ؟!
كويتي: اي والله صامل وواثق باختراعك وبشاركك اللحظة التاريخية
مرعي: يالله اركب مشينا على بركة الله ..
وحطوا المقاس على 20 سنه قدام .. وفعلا انتقلوا ل 2042م
بعد ماوصلوا حلصوا فيه فيه تغيرات من ضمنها ان السعودية حققت كاس العالم 2034
وايضاً صارت فيه تطورات تكنلوجيه كبيره حيث ان السيارات صارت تطير بدال ماتمشي وايضاً صار فيه كواكب جديده صالحه للعيش و الناس تسافر بين الكواكب شي طبيعي جداً
بعد ماشافوا المستقبل مرعي وكويتي قرروا يرجعون
وركبوا الآله ويحط مرعي 200 سنه ورا بدال مايحط 20 سنه زود صفر بالغلط !
ويرجعون 200 سنه !!
والآله تنتقل فيهم وتلخبط المكان والزمان فجأه يطيحون بصحراء قاحله ويطلع من الآله دخان وتنفجر وصارت اجزاء متناثره بالارض
كويتي: اخخ ياراسي وش سويت فينا انت وش سويت؟؟؟؟
مرعي: والله ماكان قصدي بس انا شكلي زودت صفر بالغلط
فجأه يسمعون صوت آآآخ ياعصعصي
بسم الله من صاحب هالصوت ؟؟
نوف !!
وش جابك هنا يانوف
نوف: والله مدري انا كنت اسوي لهم بينقو بالقروب فجأه لقيت نفسي معكم
مرعي: يوه شكل المكينه سحبتك معنا بالغلط
كويتي : لاحول ولاقوة الا بالله طيب وش نسوي الحين
مرعي: مشينا ندور اقرب محل نجيب منه عدّه وقطع غيار ونحاول نصلح الآله عشان نرجع ..
نوف: اف وش هالريحه تشمون ريحة خياس ؟
كويتي: لا لا مانشم شي
مرعي: اف اي والله كنها ريحة قطو ميت له مية سنه
نوف: كويتي وراك مبعد هناك
كويتي: مافيني شي !!
مرعي: افا كويتي وش ذالريحه الله يخزيك !!
كويتي: كله منكم انا ناوي اروح للحمام ومع الاصطدام عجزت امسك نفسي
نوف: خلاص خلونا من الموضوع الحين نبي نشوف لنا حل الحين نبي احد
..
المكان: مجهول
الزمان: ١٠:٠٠ صباحاً
الوضع: الثلاثه يمشون بالصحراء الى هدف غير معلوم
كويتي: ياجماعه احد معه شي نستفيد منه؟ فرغوا اللي بجيوبكم خل نشوف
مرعي: انا والله مامعي الا كيس بنده كنت جايب لبنتي اريام اندومي
نوف: وانا ما معي الا اللابتوب بس
كويتي: وانا معي طاقية ومسواك وكتاب حصن المسلم!
مرعي: تشوفون هناك فيه مبنى مشينا نروح له يمكن نلقى احد يسعفنا
بعد ماوصلوا المبنى حصلوه مبنى قديم وتصميمه اثري يشبه المعبد
وفيه واحد واقف عند البوابه لابس لبس اسود ومن عند رقبته قطعة قماش صغير ابيض قال اهلاً بكم يارفاق في ارض الفلاهالا
معكم الأب جورج لقد وصلتم الى الامان
قولوا لي ايها الرفاق ماهي اسمائكم؟
نوف: انا اسمي نوف من جده
ويقاطعها مرعي بسرعه قال نعم ايها الاب جورج اعرفك بأنفسنا انا الاب مرعي وهذا الاب كويتي وهذه الأخت الراهبه نوف
الاب جورج: حللتم اهلاً ووطئتم سهلاً تفضلوا
.
.
.
يُتبع في الحلقة القادمة . . .
تعليقات
إرسال تعليق